Ձեռնարկությունների ինկուբատոր հիմնադրամի (ՁԻՀ) և «Օրանժ Արմենիա» ընկերության միջև այսօր ստորագրվեց համագործակցության հուշագրի ստորագրման արարողություն:
Հուշագիրը ստորագրվեց «Համակարգիչ բոլորի համար» ծրագրի շրջանակում համագործակցություն ծավալելու նպատակով: ՁԻՀ-ի կողմից հուշագիրը ստորագրեց ՁԻՀ-ի Հոգաբարձուների խորհրդի նախագահ, ՀՀ էկոնոմիկայի նախարար` Տիգրան Դավթյանը, իսկ «Օրանժ Արմենիա» ՓԲԸ-ի կողմից` գլխավոր տնօրեն` Բրունո Դյութուան:
Հիշեցնենք, որ «Համակարգիչ բոլորի համար» ծրագիրն ուղղված է Հայաստանում տեղեկատվական և հեռահաղորդակցության ոլորտների զարգացմանը և տեղեկատվական հասարակության կայացմանը, մասնավորապես` հասարակության լայն խավերի շրջանում համակարգիչների տարածման, ինտերնետ հասանելիության ապահովման և էլեկտրոնային բովանդակության օգտագործման ծավալների մեծացմանը:
«Մեր նպատակն է համակարգիչների մատչելիության ապահովումը քաղաքացիների համար, որովհետև այսօր համակարգիչն անհրաժեշտություն է: Դա ոչ միայն տեղեկատվության, ժամանցի միջոց է, այլ, ամենակարևորը, համակարգիչը հանդիսանում է արդյունավետ աշխատանքի միջոց»,- ասաց Տ. Դավթյանը` հավելելով, որ համակարգչի միջոցով կարելի է ավելացնել գիտելիքները, լուծել աշխատանքի խնդիրներ և լայնորեն օգտվել ինտերնետի հնարավորությունից:
«Օրանժ Արմենիա»-ն ծրագրի շրջանակներում հանրապետության բոլոր մարզերում գտնվող իր սպասարկման կենտրոններում իրականացնելու է համակարգիչների վաճառք:
Բ. Դյութուայի կարծիքով, այս ծրագիրը հնարավորություն է տալիս համակարգիչը հասանելի դարձնել հատկապես հեռավոր տարածքներում.
«Մեզ համար այս նախագիծը շատ նման է մեր պետության քաղաքականությանը, որը միտված է եղել քաղաքացիների համար ինտերնետը հասանելի դարձնելուն», - ասաց նա:
ՁԻՀ տնօրեն Բագրատ Ենգիբարյանի խոսքով` ծրագիրը լուրջ խթան կհանդիսանա ոչ միայն համակարգիչների տարածման, այլև ինտերնետի զարգացման համար:
«Համակարգիչ բոլորի համար» ծրագիրն իրականացվում է ՁԻՀ-ի կողմից` ՀՀ կառավարության, Էկոնոմիկայի նախարարության, Համաշխարհային բանկի և Կենտրոնական բանկի աջակցությամբ:
